Azərbaycan prezidenti Rusiya prezidentinə zəng vurub
Noyabrın 10-da Azərbaycan prezidenti İlham Əliyev Rusiya Federasiyasının prezidenti Vladimir Putinə zəng edib.
Bununla bağlı Azərbaycan prezidentinin mətbuat xidməti məlumat yayıb.
Məlumata görə, Azərbaycan prezidenti Rusiya Hərbi Hava Qüvvələrinin helikopterinin Azərbaycan-Ermənistan sərhədinin Naxçıvan sahəsində vurulması ilə bağlı başsağlığı verib.
“Prezident İlham Əliyev bu faciəli təsadüfə görə üzrxahlıq edərək bildirib ki, günün qaranlıq vaxtında həmin helikopter Ermənistan hərbi hava qüvvələrinin helikopteri hesab edilib.Dövlətimizin başçısı həlak olanların doğmalarına və yaxınlarına başsağlığı verilməsini xahiş edib, xəsarət almış pilotun tezliklə sağalmasını arzu edib” - məlumatda deyilir.
Açıqlamaya görə, prezident İlham Əliyev Azərbaycan tərəfinin həlak olmuş və xəsarət almış pilotların ailələrinə kompensasiya ödəməyə hazır olduğunu bildirib:
“Prezident İlham Əliyev prezident Vladimir Putinə bildirib ki, Azərbaycan Respublikasının Baş Prokurorluğu tərəfindən bu fakt üzrə cinayət işi qaldırılıb, təhqiqat aparılır. Təqsirkarlar cəzalandırılacaq və bu barədə Rusiya tərəfi məlumatlandırılacaq”.
Məlumata görə, prezident Vladimir Putin telefon zənginə görə prezident İlham Əliyevə təşəkkürünü bildirib, belə insidentlərin yolverilməz olduğunu qeyd edib:
“Tərəflər gələcəkdə belə hallara yol verilməyəcəyinə əmin olduqlarını bildiriblər.”
Prezident Vladimir Putin isə bunları söyləyib:
“Mənim fikrimcə, dediyim kimi, bu, həqiqətən həm erməni, həm də Azərbaycan xalqlarının xeyrinə və onların mənafeyi naminədir. Rusiya öz tərəfindən əlindən gələni edəcək ki, üç tərəf arasında danışıqların gedişində əldə edilmiş mövqelər, bu gün bizim imzaladığımız bəyanat hamısı icra olunsun”.
Zakir Həsənov helikopterlə bağlı Rusiyaya başsağlığı verib
Azərbaycan Respublikasının müdafiə naziri general-polkovnik Zakir Həsənov Rusiya Federasiyasının müdafiə naziri Sergey Şoyquya başsağlığı verib.
Nazirliyin rəsmi saytında dərc edilmiş başsağlığında deyilir:
“Rusiya Federasiyası Hərbi Hava Qüvvələrinə məxsus helikopterlərin əvvəllər müşahidə olunmadığı Ermənistan-Azərbaycan dövlət sərhədinin bilavasitə yaxınlığında, sutkanın qaranlıq vaxtı, aşağı hündürlükdə, hava hücumundan müdafiə radarlarının müşahidə zonasından kənar, Ermənistan-Azərbaycan Dağlıq Qarabağ münaqişəsi zonasında aktiv döyüş toqquşmasının davam etdiyi bir vaxtda uçuş həyata keçirən Mi-24 helikopteri ilə baş vermiş faciəvi hadisə məni dərindən kədərləndirdi. Təsadüfi xarakter daşıyan və Rusiya tərəfinə qarşı yönəlməyən bu faciəvi hadisə ilə bağlı Rusiya tərəfinə üzrxahlıq bildiririk”.
Zakir Həsənov bildirir ki, Azərbaycan Ordusunun şəxsi heyəti və şəxsən öz adından həlak olan ekipaj üzvlərinin ailələrinə, əzizlərinə və yaxınlarına başsağlığı bildirir və xəsarət alanların tezliklə sağalmalarını diləyir.
Azərbaycan XİN Rusiya helikopterinin vurulması ilə bağlı bəyanat yayıb
Azərbaycan Xarici İşlər Nazirliyi (XİN) Rusiya helikopterinin vurulması ilə bağlı bəyanat yayıb.
XİN bildirir ki, Azərbaycan Müdafiə Nazirliyinin Rusiya Müdafiə Nazirliyindən aldığı məlumata əsasən, noyabrın 9-u, saat 18:30-da Ermənistan-Azərbaycan sərhədinin Naxçıvan hissəsində Rusiyaya məxsus Mi-24 hərbi helikopteri vurulub.
Nazirlik bununla bağlı aşağıdakıları qeyd edib:
“- Helikopter Ermənistan-Azərbaycan Dağlıq Qarabağ münaqişəsi zonasında aktiv hərbi döyüşlərin davam etdiyi bir vaxtda Ermənistan-Azərbaycan dövlət sərhədinin tam yaxınlığında uçuşu həyata keçirib.
-Uçuş günün qaranlıq vaxtında, aşağı hündürlükdə, hava müdafiəsi sisteminin radar müşahidəsindən kənar zonada həyata keçirilib”.
Habelə bildirilir ki, bundan öncə həmin ərazidə Rusiya Federasiyası Hərbi Hava Qüvvələrinin helikopterləri müşahidə edilməyib.
“Qeyd olunan amilləri və bölgədəki gərgin vəziyyəti, habelə erməni tərəfinin mümkün təxribatları ilə əlaqədar yüksək döyüş hazırlığını nəzərə alaraq, növbətçi hərbi bölüm tərəfindən atəşin açılması qərarı verilib.Təsadüfi xarakter daşıyan və Rusiyaya qarşı yönəlməyən bu faciəvi hadisə ilə bağlı Azərbaycan tərəfi Rusiya tərəfinə üzrxahlığını bildirir”.
Məlumata görə, Azərbaycan həlak olan ekipaj üzvlərinin ailələrinə dərin başsağlığı verir və xəsarət alanların tezliklə sağalmalarını diləyir.
“Azərbaycan tərəfi müvafiq kompensasiyanın ödənilməsinə hazır olduğunu bildirir” - məlumatda deyilir.
‘48 kənd, 1 qəsəbə və 8 strateji yüksəklik azad edilib’
Azərbaycan prezidenti İlham Əliyev bugün, noyabrın 9-da 48 kəndin, 1 qəsəbənin və 8 strateji yüksəkliyin işğaldan azad edildiyini açıqlayıb.
Bu barədə Azərbaycan prezidenti İlham Əliyev özünün Twitter hesabında yazıb.
O qeyd edib ki, Xocavənd rayonunun Mets Tağlar, Salakətin, Zoğalbulaq, Aragül, Tağavard, Böyük Tağavard, Zərdanaşen, Şəhər, Xocalı rayonunun Şuşakənd, Muxtar, Daşaltı, Füzuli rayonun Aşağı Güzdək, Qovşatlı, Mirzəcamallı, Şəkərcik, Mərdinli, Şıxlı, Qaraməmmədli, Dövlətyarlı, Hacılı, Hüseynbəyli və Saracıq kəndləri işğaldan azad edilib.
Prezidentin deməsinə görə, Zəngilan rayonun da Sobu, Qaragöz, İsgəndərbəyli kəndləri, Bartaz qəsəbəsi, Bartaz (2300 metr), Sığırt (1370 metr), Şükürataz (2000 metr) və əlavə 5 adsız strateji yüksəklik də Azərbaycanın nəzarətinə keçib.
O habelə qeyd edib ki, Cəbrayıl rayonunun Qalacıq, Mollahəsənli, Əsgərxanlı, Yuxarı Nüsüs, Aşıq Məlikli, Niftalılar, Qərər, Çələbilər, Qubadlı rayonunun Qaramanlı, Xəndək, Həmzəli, Mahrızlı, Hal, Ballıqaya, Ulaşlı, Tinli, Xocahan, Boyunəkər, Qaraqoyunlu, Çərəli və Laçın rayonunun Güləbürd, Səfiyan, Türklər kəndi də azad edilib.
Azərbaycan prezidenti noyabrin 9-da, gündüz saatlarında da 23 kəndin işğaldan azad olunmasını bildirmişdi.