Parlament qarşısında etirazçılar saxlandı

Aksiyadan təxminən 20 dəqiqə sonra İlqar Məmmədov Badamdar qəsəbəsində sərbəst buraxılıb. Ancaq İ. Məmmədov deyib ki, REAL Hərəkatı sənədlərin ikinci oxunuşunun müzakirəsi zamanı da belə bir aksiyanı təkrarlayacaqlar.


REAL-IN AKSİYA CƏHDİ

«REAL» Hərəkatı «İnformasiya əldə etmək haqqında», «Kommersiya sirri haqqında» qanunlara etmək istədikləri dəyişikliklərə etiraz olaraq Parlament binası qarşısında aksiya keçirmək istəyib. Lakin polis etirazçılara toplaşmaq imkanı verməyib. «REAL» Hərəkatının həmsədri İlqar Məmmədov polis maşınında, digər fəallar isə «18» saylı marşruta mindirilərək ərazidən uzaqlaşdırılıb.

Hazırda Milli Məclisin dörd tərəfi polislə əhatələnib.

«İnformasiya əldə etmək haqqında» qanuna dəyişiklik təklifi iyunun 1-də parlament komitələrinin iclaslarında müzakirə edilib. Dəyişikliklərə görə, informasiyanın əldə olunmasına o şərtlə icazə verilə bilər ki, bu, Azərbaycanın siyasi, iqtisadi və hərbi sahələrdə milli maraqlarının, maliyyə-kredit və valyuta siyasəti sahələrində mənafelərinin, ictimai qaydanın, sağlamlığın və mənəviyyatın, şəxslərin hüquq və azadlıqlarının, kommersiya və başqa iqtisadi maraqlarının qorunması, məhkəmənin nüfuzunun və qərəzsizliyinin təmin edilməsi məqsədlərinə zidd olmasın.

Bundan başqa, Azərbaycanda yeni bir qanun layihəsi də hazırlanıb: «Hüquqi şəxslərin dövlət qeydiyyatı və dövlət reyestri haqqında». Qanun layihəsinə görə, kommersiya hüquqi şəxslərin təsisçiləri (iştirakçıları) və onların nizamnamə kapitalındakı payları barədə məlumatlar gizli saxlanılacaq.