18 yaşdan aşağı buraxılmır....
Saat 15 00-dan "Məhsul" stadionuna adamların buraxılmasına başlanıb. Onlar yoxlanılır. Yaşı 18-ə çatmayanların isə stadiona girişi əngəllənib.
Etirazçılar əllərində adları siyasi məhbus siyahılarında olanların şəkillərini tutublar.
Onlar həmçinin "Leyla Yunusa azadlıq", "Avropa Birliyi ilə assosiasiya sazişi imzalansın", "Dostunu göstər, deyim kimsən" "Bunlar yeyib doyub, hesabı gətirin", "Kredit içində boğuluruq" və s. fikirlər yazılmış şüarlar qaldırıblar.
AzadlıqRadiosunun müxbiri saxlanıb
AzadlıqRadiosunun müxbiri Yafəz Əkrəmoğlunu Metro Polisi saxlayıb. Səbəbsə mitinqin keçiriləcəyi "Məhsul" stadionuna yaxın yerləşən "İnşaatçılar" metrosunun çıxışında çəkiliş aparması olub:
“Metronun çıxışında hər zamankından daha çox polis vardı. Ola bilsin bugünkü mitinqlə əlaqədardır. Metro polisi məni saxladı. Bildirdi ki, çəkiliş aparmaqla qanunu pozuram”.
Polis əməkdaşları Yafəz Əkrəmoğlunun fotoaparatındakı şəkilləri sildikdən sonra onu sərbəst buraxıblar.
Stadion mühasirədə
AzadlıqRadiosunun müxbiri xəbər verir ki, mitinqin keçirildiyi "Məhsul" stadionunun ətrafını polis mühasirəyə alıb. Stadionun ətrafında və yaxın yerlərdə piyada və avromobillərin hərəkəti məhdudlaşdırılıb.
Stadiona adamların saat 15 00-da buraxılacağı deyilir. Müxbir bildirir ki, hazırda stadionda daxili qoşunların 5 nəfər silahlı əsgəri var. Onlar stadionda qurulan tribunanın ətrafını lentlə mühasirəyə alıblar. Təşkilatçılara bildiriblər ki, təhlükəsizlik tədbirləri görmək üçün bunu edirlər.
«Məqsədimiz Azərbaycanın imicinə ziyan vuran repressiyalara yox deməkdir». - Bunu Milli Şuranın təyin etdiyi mitinq haqda qurumun sədri Cəmil Həsənli deyib. Onun sözlərinə görə, Azərbaycanda siyasi və vicdan məhbuslarının sayı 105 nəfəri ötüb, ona görə də «siyasi məhbuslara azadlıq» şüarı ilə mitinq keçirmək qərarı verilib.