«Tıxacların qarşısını almaq üçün yüksək mərtəbəli avtodayancaqlar tikilməlidir»
Deputat Aydın Mirzəzadə təklif edir ki, Bakıda tıxacların qarşısını almaq üçün yüksək mərtəbəli avtodayancaqlar tikilsin. Millət vəkili hesab edir ki, belə dayanacaqları tikmək üçün sahibkarları həvəsləndirmək lazımdır:
«Şəhərdə yüksək sıxlıq olan yerlərdə yüksək mərtəbəli avtodayancaqlar tikilə bilər. Sahibkarlara güzəştlər tətbiq edilə bilər, məsələn, onları vergidən azad etmək olar».
#MM «Saxlama mərkəzlərində hüquq və azadlıqlar yüksək səviyyədə qorunacaq» http://t.co/zbYVMRma0t
— AzadliqRadiosu (@RadioAzadliq) 19.11.2014
«Sabah İŞİD gələndə bəstəkar axtarmayacaq»
Siyavuş Novruzov: «23 ildir eşidirik ki, təhsildə islahatlar gedir, biri Bolinoya gətirir, biri Kurrikulum. Amma ildən-ilə də Tələbə Qəbul Dövlət Komissiyasının imtahanlarında ballar aşağı düşür. Müəllimlərin sayı əhali nisbəti ilə götürsək, ABŞ-dakı müəllimlərdən 3 dəfə çoxdur.
Hərbi xidmətə çağrılan gənclərin əksəriyyəti ordunun tələblərinə cavab vermir. Məktəblərdə hərbi dərsləri bərpa etmək lazımdır. Sabah İŞİD gələndə bəstəkar axtarmayacaq. Onun qabağına əsgər çıxmalıdır. Heç olmasa, silahın növlərini bilsinlər. Bizdə iki ton kitab çap edirlər. Üz qabıqlarını da elə düzəldirlər, soyuq silaha oxşayır, kimin başına vursan, orda qalar, içində də bir şey yoxdur».
Siyavuş Novruzov daha sonra siyasi partiyaların maliyyələşməsi məsələsinə toxunub: «QHT-lərlə bağlı qanun qəbul elədik ki, onlar nazirliklərdən də, fərdi şəxslərədən də, reklam sifarişləri də ala bilərlər. Bəs bu siyasi partiyalar nədən sifariş alsın? Nəyi reklam etsinlər? Partiyaların maliyyə büdcəsini artırın ki, bunların da bir qırışığı açılsın».
«Orta məktəb müəllimləri ipotekadan yararlana bilmir»
Deputat Qənirə Paşayeva müəllimlərin əməkhaqlarının aşağı olması səbəbi ilə ipotekadan yararlana bilmədiklərini deyib:
«Orta məktəb müəllimlərinin böyük bir hissəsi ipotekadan yararlana bilmir. Onlar ipoteka üçün müraciət edəndə əməkhaqlarının ipotekanın ödənişi üçün lazım olan standartlardan aşağı olması əsas gətirilir və onların bir çoxu dövlətin bu sistemindən yararlana bilmirlər».
O, bildirib ki, orta məktəb müəllimlərinin ipotekadan öz mənzil problemlərinin həlli üçün yararlana bilməsi üçün mexanizmlərə ehtiyac var. Qənirə Paşayevə müəllimlərin maaşlarının artırılmasına və ipoteka şərtlərinin yumşaldılmasına çağırıb.