Məhkəmə tərkibinə etiraz
Xədicə İsmayılın məhkəməsi davam edir.
Vəkil Fariz Namazlı deyib ki, birinci hissədə verdikləri vəsatətlər təmin edilməyib.
Xədicə İsmayıl bu günədək qaldırılan vəsatətləri təmin etmədiyinə və qərəzli olduğuna görə ilk öncə məhkəmə tərkibinə etirazını bildirib. Məhkəmə vəsatəti rədd edib.
Vəkil deyir ki, onlar Tural Mustafayevin əvvəllər işlədiyi KİV-lərin redaktorlarının və Mustafayevi müalicə edən psixoloq Araz Manuçöhrün məhkəmədə dindirilməsi haqda vəsatət qaldırıblar. Bu vəsatətlər də rədd edilib.
Bir həftə fasilə istədi
Jurnalist istintaqda şahid kimi ifadə verən Ramal Hüseynovun da məhkəməyə dəvət edilməsini istəyib. O, adıçəkilən şəxsin üzünü görmədiyini söyləyib.
Bundan başqa, o gündə iki saat açıq havada olmaq hüququndan yararlana bilmədiyini və vəkilləri ilə məsləhətləşməkdən ötrü məhkəmənin bir həftə fasilə verməsini istəyib.
Vəsatətlərin heç biri təmin edilməyib.
Xədicənin Turala sualları var
Xədicə İsmayılın məhkəməsində saat 15-dək fasilədir.
Jurnalistin anası Elmira İsmayılova AzadlıqRadiosuna bildirib ki, Xədicə İsmayıl ittiham tərəfinin zərərçəkən kimi təqdim etdiyi Tural Mustafayevin məhkəməyə dəvət olunmasını istəyib. Ona verdiyi ifadəylə bağlı bir neçə sualı olduğunu bildirib.
Xədicə İsmayıl anasıyla görüşə şərait yaradılması üçün hakimə müraciət edib. Jurnalist ötən məhkəmə iclaslarında da eyni tələblə çıxış etmişdi. O, məhkəmə fasiləsiz davam etdiyi üçün ailə üzvləri və vəkilləri ilə görüşə bilmədiyini demişdi.