Azərbaycanda parlament seçkiləri [dəqiqəbədəqiqə]

İlham Əliyev ailə üzvləri ilə birlikdə seçkilərdə iştirak edib

Məntəqə seçki komissiyasının sədri Rüfət Həsənov ilk dəfə səs verməsi münasibətilə İlham Əliyevin oğlu- Heydər Əliyevi Mərkəzi Seçki Komissiyasının adından təbrik edib

Karusel

«7 saylı məntəqədə sədr tərəfindən bir topa bülleten atmasını qeydə aldıq. Bunu MSK-nın səhifəsində də yerləşdirmişik. Etiraz edib aktlaşdırırıq, ancaq akta qol çəkmirlər».

Bunu AzadlıqRadiosuna 32 saylı Suraxanı 3-cü seçki dairəsindən namizədliyini irəli sürmüş «Təmiz Dünya» təşkilatının sədri Mehriban Zeynalova bildirib.

Mehriban Zeynalova deyir ki, bir neçə məntəqədə «karusel»dən istifadə olunur, eyni adamlar ayrı-ayrı məntəqələrdə səs verir:

«Maşınların nömrələri də var. Ancaq aktlaşdıra bilmədiyimizdən sübut kimi verə bilmirik. Biz əsas videogörüntülərə üstünlük veririk».

32 saylı Suraxanı 3-cü seçki dairəsindən AzadlıqRadiosuna bildirdilər ki, hansı namizədin şikayəti varsa, araşdırılacaq.

Müsavat pozuntulardan danışır, MSK isə...

«63 saylı Sabirabad birinci seçki dairəsində deputatlığa namizəd Pənah Hüseynin səlahiyyətli nümayəndəsi iki seçicinin əlindən bülleteni alaraq, qaçıb». Ətraflı burada

​Komissiya sədri namizədi döymək istəyib?

İmişli rayonunun Hacalmuradlı kəndində yerləşən 79 saylı İmişli seçki dairəsinin 25 saylı məntəqəsində qalmaqal yaşanıb.

Müsavat Partiyası tərəfindən namizədliyi irəli sürülmüş İltizam Əkbərli deyir ki, səsvermə otağında həmin dairədən YAP-ın namizədi olan Əsabil Qasımovun lehinə işarələnmiş topa bülleteni bir seçicinin əlindən alıb. İltizam Əkbərlinin sözlərinə görə, bu zaman məntəqə komissiyasının sədri Fazil Tarıverdiyev hücum çəkərək onu vurmağa cəhd edib.

İ.Əkbərli bildirir ki, zor tətbiq etməklə bülletenləri onun əlindən alaraq qutuya atıblar. Bundan sonra səsvermə otağına polis çağırıldığını deyən müsavatçı namizəd onların təhdidi ilə üzləşdiyini iddia edir. Onun sözlərinə görə, DSK sədri zəng edəndən sonra ona səsverməni izləməyə icazə verilib.

Ancaq DSK sədri Sabit Yaqubov İltizam Əkbərlinin dediklərini təkzib edir. Sabit Yaqubov Azadlıq Radiosuna deyib ki, namizəd məntəqə sədrinə böhtan atır: «Yalan məlumatdır. Əksinə İltizam Əkbərli məntəqələri gəzib, qanun pozuntularına yol verir».