70 saylı Neftçala seçki dairəsində səyyar səsvermə ilə bağlı şikayət var.
Deputatlığa namizəd Vəfa Nağının seçki qərargahından bildirilib ki, həmin seçki dairəsi üzrə 51 min 462 nəfər seçici qeydə alınıb, səyyar səsvermə üçün müraciətlərin isə 3 min olduğu bildirilir: "Neftçala üçün bu, fantastik rəqəmdir. O qədər xəstəliyi, əlilliyi olan adam varmı rayonda? Bu, şübhələr yaradır".
Müsavat Partiyasından verilən məlumata görə, 8 saylı Binəqədi birinci seçki dairəsində bir neçə müşahidəçiləri seçki məntəqəsinə buraxılmayıb. Partiyadan qeyd edildiyinə görə, Cavad Qafarovu 283 saylı məktəbdə yerləşən 12 saylı məntəqədən polis vasitəsilə çıxarıblar: "Digər müşahidəçi Eldar Nəsibzadə 20 və 21 saylı məntəqəyə buraxılmayıb. Deyirlər ki, müşahidəçi vəsiqəsində məntəqənin nömrəsi yazılmalıdır. Halbuki Mərkəzi Seçki Komissiyasının (MSK) respublika üzrə müşahidəçiləri istənilən məntəqədə müşahidə apara bilər".
Mərkəzi Seçki Komissiyasının (MSK) mətbuat xidmətindən isə "Turan"a deyiblər ki, Müsavat Partiyasının bu açıqlamasında deyilənlərin əsası yoxdur.
42 saylı Sumqayıt birinci seçki dairəsində 22 saylı məntəqənin qanunvericiliyin tələblərinə cavab verməyən qaydada təşkil edildiyi bildirilir. Şikayətə görə, seçki məntəqəsi elə qurulub ki, müşahidəçilər seçki prosesini izləməkdən təcrid olunub.
Üzərində 17 saylı Yasamal seçki dairəsinə aid olduğu bildirilən bu bülleteni seçici AzadlıqRadiosuna göndərib. Orada həbsdə olan bəzi jurnalist, ictimai fəal və müxalifətçilərə azadlıq tələb edilir.
